Musenblätter - Das unabhängige Kulturmagazin

Foto © Frank Becker

Mehr Zivilcourage!

Han Sie schon jehürt? 78 % aller bayerischen Straftäter sin Katholiken! Sch´meine: dat muß man sich ens vürstelle! Do muß sofort jet passeere, bevor dat die Welle nohm Rheinland övverschwapp! Ich meine: do kann sich jo keene mih vür die Dür traue, wenn dat lossjeiht. Ich dät - quasi als Sofort-Maßnahme - vürschlage:

ad 1: Erfassung aller Katholiken

ad 2: Katholiken ohne Wohnung, Arbeit und/oder Aufenthaltsgenehmigung: dreck av nohm Auffanglager (provisorisch: Müngersdorfer Stadion, dann: Unna-Massen).

ad 3: Avschiebung vun all denne in ihr Heimatland - nohm Vatikan! Ewwer dalli! Weil: Deutschland muß sauber blieve un et Rheinland och!

Blödsinn? Absurd? Jo sicher - ewwer: wo es dann dä Ungerschied zum "Ausländer raus!"? Arsch huh - Zäng ussenander! Dat heißt och: dr Kopp es net nur zum drophaue do, sondern och für jet nohzedenke! Un dat heißt zum Beispiel: ohne "Ausländer" jöw et im Rheinland (un Westfalen, brrr…)nur hallev esu vill Weetschafte, vum Krankehuus, Busfahren, Müllabfuhr un Zeidung koofe janz ze schweige. Un wat do sonst noch all es. Un dat heißt net nur: "Mir bruche Üch", sondern: "Schön, dat Ihr do seid!". Un dat kann man och en dr Weetschaff einem sage, dä dumme Sprüch am kloppe es. Och wenn dat jet Zifilcourage bruch. Ewwer: wenn mir die nit mieh han, künne mir dreck inpacke. Nur darf sich dann bitte keiner wundere, wenn die Schnürstiefel immer wigger et Muul oprieße. Et jitt och für die richtige Seite Vürbilder, un net nur die Edelweiß-Piraten! Wolfgang Niedecken hätt dodefür jetz verdient et Bundesverdienstkrüz jekrägen. Leider is uns Fründ Karl-Heinz Pütz, der fest hinger der Bewejung jejen Rechtsextremismus, Rassismus und Ausjrenzung stand, vor e paar Tag jestorben. An ihn wolle mir hück besonders denken. Also dann: Arsch huh - Zäng ussenander. Net nur jelejentlich met Opmärsch protestiere: och hück un morje, zu Hus, en dr Gass un en dr Weetschaff! Net verjesse: mir sin vill!

In diesem Sinne

Ihr

Konrad Beikircher