Grabgedanken

von Konrad Beikircher

Foto © Frank Becker
Grabgedanken
 
Also wenn man sich datens esu richtig vürstellt: do besse do en dr Kiß am lijje, alles schön ruhig un kei Spreche mieh övver nüß un wunderbar. Un ma denk esu bei sich: Jot, jetzt isset vorbei, all do bovve künne mich am A... lecke, loß die sich kloppe wie sie wolle, ich han ming Rauh. E Levve lang han ich mich jeböck un sin jeloofe un all dä Driß, jetz sin die dran. Un et es jot esu, weil: et muß all sing Engk han. Av un an kütt ming Frau, flügg paar Blömcher hinjestallt un : "och, leven Mann, du hässet jot" un esu, un es mir am verzälle, wat do bovve loss es un ich driehen mich eröm en dr Kiß und denken esu bei mich:"Du leven Jott, wat bisse fruh, dat du et hinger dir häs". Also: dat es der Normalfall. Dat et Levve nohm Duud esu zehn, zwanzig Johr quasi wiggerlööf - falls man en dr Kiß litt, bovve e Krüzz un der Fall hätt sich. Nur: falls sie dich en dr ovve däue un dich verbrenne, jitt et kei Jemötlichkeit mieh un kei Jespräch dodrövver, wat jetz, wo du nit mieh bes, es, un wat net. Weil: die däue dich do erein, 700 Jrad un en zwei Sekunde es dat Dingen am Engk. 10 Jramm Äsch un der Fall es jeloofe. Jo es dat net furchtbar? Un dat don 80 % vun all denne Norddeutsche! Un fülle dich dann en en Vas un düvvele dich dann en en Loch en dr Muur un dat soll schön sin? NICHT MIT MIR! sät dä Rheinländer und bliev bei Erdbestattung. He es et nur jeder sechste Duude, der nohm Füür rööf. Un dat es at zevill. Ich sare immer: Füür es für dä Protestant, meinshalben. Soll er han, wenn hä jlöcklich es dabei. Ewwer dä "normale" Jlauben, un dat es em Rheinland dr Fall, dä will nohm Duud noch jet han vum Levve, un dat kann man bei verbrenne net. Wat wör dä November ohne dat schöne Zwiejespräch om Jrav, wenn sie all do bovve ston: Frau, Kinder un Enkelcher? Un paar Blömcher en dr Ääd un ene Käzestump, dat man jet süht. Für mich litt em Füür kene Trus für die Zick donoh!
 
In diesem Sinne
Ihr
Konrad Beikircher
 


© 2011 Konrad Beikircher für die Musenblätter - Redaktion: Frank Becker