Die rheinische Lösung

von Konrad Beikircher

Foto © Frank Becker
Die rheinische Lösung
 
Jeder weiß: Polizei es nüdich, willse maache. Mr will sie net bruche, et es ewwer jot, dat se do es. Un - simmer iehrlich - e bißje Bammel hät jeder, wenn do plötzlich eine Poliziß vür einem steiht un froch: “Haben Sie heute Abend Alkohol zu sich genommen?“. Do dät mr am leevste op jot bayerisch sage: „Net direkt!“. Nur: sie hät et och nit leicht, die Polizei. Et Jesetz em Kopp (hoffentlich), dr Jäger em Nacke un eine schimpfende Bürjer vür einem! Oft don sie mir leid, die Poliziste. Ewwer dann jitt et Momente, wo die Polizei jenau dat Jejenteil vun demm dät, wat mr denk. Un dat wor natürlich en Kölle. Un do kannich nur sage: SUPER! Wat wor? Noh irjend ennem wichtije Spill Italien jejen ich weiß-jor-nitmehr-jejen-wen woren nit nur die Tifosi em Heimatland sondern (normal) och uns kölsche Italiäner över dat knappe Erjebnis pro Italia völlig ussem Hüsje. Un mr kennt jo dr Spaghetti: wenn dä sich freut, dann richtig. Do weed en et Auto jesprunge, do weed jehup, do weed em Kreis jefahre un wat weiß ich noch all. Jot: do hammer Neapel am Rhing! Un et es och schön esu. Nur: et jitt Lück, die wolle noh Hus fahre oder noh dr Mamm an dr Eck oder wat, un die kumme nit vüran, weil uns kölsche Italiäner do em Kreis am fahre sin. Un do muß die Polizei her. Un wat hät uns kölsch Polizei jedon? Die han koozerhand dä halve Ring jesperrt, bovve un unge, han dr Verkehr ömjeleitet un dr kölsche Italiäner fiere losse. Jungens, dat wor Spitze! Dat wor en echt rheinische Lösung! Överall suns hät die Polizei dozweschefahre müsse (un ich jläuwen: keiner hät et jään jedon), weil: wo gibt’s denn sowas, der Verkehr muß rollen, wir sind hier schließlich in Deutschland! Enee, nit esu en Kölle! He simmer pro Ausländer un do kann och dä Italiäner esu fiere, wie he will. Un wenn et op dr Stroß es. Un dat wor esu ansteckend, dat och die deutsche Kölsche mitjemaht han. Dat es „La kölsche Vita“, wie minge Fründ, dä Schröder, immer säht. Dat es eine Orden wert un dat wor ei jot Beispill!
 
In diesem Sinne
Ihr
Konrad Beikircher
 
 
 

© 2012 Konrad Beikircher für die Musenblätter - Redaktion: Frank Becker