Sure Kappes jejen Frühjohrsmödigkeit?

von Konrad Beikircher

Foto © Frank Becker
Sure Kappes jejen Frühjohrsmödigkeit?
 
Han Sie dat jelesse? Dä weßfälisch - lippische Buureverband hät jesaat, dat sure Kappes jot wör jejen Frühjohrsmödigkeit. Also, ich wußt jo jar net, dat et do hinge en lippisch Kongo och Kappesbuure jitt. Erstaunlich, ne. Ich daacht immer esu bei mich: wat möjen die Lipper do hinge dann außer Torfstechen eijentlich dun? Un: kann man davon leben? Jetzt weiß ich et: die stechen och sure Kappes! Un weil dat en schwer Arbeit es, dä janze Dach em Kappes stonn un steche, weed man dovon och wach, es jo klar. Nur, leven Lippizzaner, äh, Lipper: dat es jo keen Rezept für alljemein, sch-bitte Üch. Em Rheinland es dat janz anders. Nohdemm man sich jet vom Äschermittwoch erholt hät (wat jo der anstregendste Daach es em janze Karneval), weed övverlaat, wie man die Zick bis 11.11.12 einijermaßen duutkritt. Für den richtigen Rheinländer es die Zick von Äschermittwoch bis zum Sommer die intenseevste üvverhaupts: neue Büttenreden, neue Karnevalsschlager müssen jeschriwwe un komponeet weede, dat Loch en dr decke Trumm es ze stoppe, die Perücke müsse usjebessert weede un wat do sonst noch all es. Do es keen Zick für ze schloofe! Un dann die jroßen Froge: wie soll dann dat Motto vum nächsten Zoch sin? Wer weed Prinz oder Prinzessin, Buur oder Jungfrau? Wer darf nicht mehr em Zoch mitjonn? Froge üwwer Froge! Do kann jo schon automatisch keen Frühjohrmödigkeit opkumme! Und von all dem hätt dä Lipper natürlich keen Ahnung, ewwer dat Muul oprieße! Ich meine: dä Weßfale un dä Lipper sollen sich mal janz bedeckt halten, ne, "andernfalls - Prozeß am Hals", um LSE und ihre geniale Platte "Für et Hätz un jäjen dr Kopp" zu zitieren. Mir Rheinländer saren denne do hinge och net, wie sie der Torf ze steche han. Völkerverständigung, lev lippisches Volk, fäng do an, wo man den anderen in Ruhe läßt, es dat klar?!

In diesem Sinne
Ihr
Konrad Beikircher
                                                                        
 

© 2012 Konrad Beikircher für die Musenblätter - Redaktion: Frank Becker