Dä Udo und sing Pillermann

von Konrad Beikircher

Foto © Frank Becker
Dä Udo und sing Pillermann
 
Hilfe...hihihi...Hilfe...ich kann nit mih ...hihihi...Udo Jürgens! Lesen ich en dr ahle BILD-Ziedung, wo dä Schuster minge neu besohlte Schuh drin injeschlage hätt: „Udo Jürgens entschuldigt sich bei seinen Kindern: „Einige Schlagzeilen hätte ich euch gerne erspart“. Do muss ich jliech an minge Kommentar von domols denke, 1993 nämlich, als dä Barde sich mit singem nervösen Pillermann jeautet hätt. Da han ich für dr EXPRESS dat hier jeschriwwe:
 
  Ich hätt mich bal beseck vör Laache, wie ich dat jelesse han: „Männer müssen fremdjonn“. Udo an der Bekennerfront. Es dat dann möglich?! „Siebzehn Jahr, blondes Haar, so stand sie vor mir...“ und schon kunnt uns Udo nit mih und singe kleene Fründ övernimmp et Kommando. Lev Udo, dunnens dä Frengel vör de Tür, dä Ooß joht talpe! Dat Janze kütt mir esu vür wie: je winnijer em Jlas, desto jrößer dä Doosch. Leven Udo: wat meinst Du dann, wie ejal uns dat es, ob und wat in dinge Botz los es. Jo wat dann jetz? Sollen mir uns Mädcher ensperre, nur weil dir dä Kamm am schwelle es und du domit ding Tour '92 promoten wolltes? Enee! Rheinische Mädcher han Botze an, heiß et, do kann en Dutzend kumme esu wie du. Dat nur mal dozu. Nur, wenn du meins, du tätst für alle Männer spreche: janz esu verdötsch simmer dann doch net. Nix jejen dä kleine Fründ und nix jejen en jewisse Anarchie, solang et beiden Freud mät. Ewwer dinge Spruch, dat Sex dä letzte, uns Männern verbliebene Trieb wör, erinnert mich an folgendes: ene 11jährije Panz hätt nohm Sexualkundeunterricht für sing Lehrerin jesaat: „Jetzt weiß ich alles über et Poppen, ewwer wat mich wirklich interessiert es eijentlich nur, wie ich en Modellflugzeug baue kann!“. Leven Udo, ich jlöwen, dat dinge kleine Fründ dir do ene janz schöne Streich jespillt hätt: dä kunnt dat romantisch-verlojene Jesäusels nit mih hüüre und wollt dich kräftich lächerlich maache. Un dat hätt voll hinjehauen.
 
Lev rheinische Mädcher: Mann kann emanzepeet sinn und trotzdem treu. Und wenn et nur aus Liebe es.
 
In diesem Sinne
Euer
Konrad Beikircher



 
©  2013 Konrad Beikircher für die Musenblätter
Redaktion: Frank Becker