Jenooch es jenooch.

von Konrad Beikircher

Foto © Frank Becker
Jenooch es jenooch.
 
So. Jetzt reicht et. Mir jedenfalls. Esu vill kann ich nit esse, wat ich breche künnt. Do jitt et och kei Samphandschoh un Nettigkeite mieh: ene Prifatsender es met enem Kamerateam vun drei Mann dabei, wenn Minsche sterve. Für en neu Serie oder wat. Ich frogen mich: wat sin dat für Minsche? Wie krank muß einer sin, dä esu unverfrore es, esu jet ze don? Wer hält do et Leech, wer drück dr Knopp an dr Kamera un wer hält dat Mikrophon hin, domet man alles süht un hürt? Ich sag et Ihnen: dat sin dieselben, die klatsche, wenn Asylanteheime anjezündet weede. Dat sin dieselbe, die met dr Schulter zucke, wenn Kinder dutjeprüjelt weede. Dat sin die, die für Jeld alles don. Dat sin die kleinen Schweine, für die Moral un Jewissen en Zahl om Konto met enem dicken „H“ dohinger es. Dat sin Lück, die einem em Jrunde leid don. Weil dat Lück sin, die nie wisse weede, wat dat Lächeln vun enem Panz es, wat „ich sin dir jot“ für e umfassend Jeföhl sin kann, wie schön et sin kann, einem ze helfe oder selver jeholfe ze weede, un wat et eijentlich bedeute kann, Minsch ze sin. Un: et sin Minsche, die nur Jlöck han, dat mir net 1938 oder esu schrieve, weil esu Lück woren et och, die in Auschwitz an der Rampe jestande han, wie do selekteet woode es. Geld un Einschaltquote es jedrisse, leven Prifatsender Suwiesu. Et es net alles erlaubt, nur weil et nit verbote es. Un nur weil einer Schwein es - un wenn et ene janze Sender es -, dann muß dä nit jläuwe, dat all die andere och Schweine sin. Für mich heißt dat: „Arsch huh, Zäng usenander“ es nit nur beim Thema Ausländer. Et jitt jet, wat all die, die met mir einer Meinung sin, don künne: dä Knopp für uszeschalde. Un wat mich persönlich betrifft, jon ich hiemit un öffentlich noch wigger: eimol wor ich do (met enem Liedche vür enem halve Johr) un dat wor et. Dä Beikircher? Bei denne? NIEMALS!
 
In diesem Sinne
 
Euer
Konrad Beikircher
 
 
Redaktion: Frank Becker