Computer Ich han ene Computer. Normal, ne. Un do sitzen ich dran un sin am schrieve, für de Musenblätter beispielshalber. Un do es et av un an esu, dat dä Computer mät wat hä will. Un do kriejen ich zevill. Un do froren ich dä Computer: "Wat häs du dann? Wodrum klapp dat dann net?". Un do sät dä Computer: "Power error. Replace any key for shut up!" oder esu. Un dat verstonn ich net. Un do hätt ich jetzt en jroß Bitt an all die Soff-Wäär Hersteller em Rheinland: Wie wör et dann mit enem kölschen Computer?! Ich dät die Firma "ZEMENTENS - Computer" nenne, domet schon em vürhinein klar es, dat dä Computer och sing Zick bruch. Un wenn ich dä anstelle, es dat ierschte Bild: "Zementens, ich sin noch net parat!". Un dann: "Also dann, frog mich jet" un dann don ich ihm jet injewwe, un dann sät hä: "Och frog mich net, Jung, un loß mir ming Rauh!". Un wenn ich et nochens versöken: "Do muß ich ens nohluure!". Un wenn dat ze lang dort: "Ich han keen Brill, do dort dat länger, Herrjottnochens". Un wenn hä dann endlich parat es, sät hä:"Also dann, do es dat Zeug. Un jetzt?". Un wenn ich noch jet han, kütt: "Nee, nee, zementens, eins nohm andern, ne, ich kann och net mieh als wies arbigge!". Un wenn ich jet ze lösche han, sät hä:"Prima! Fott domet! Han ich jet mieh Platz hie en dr Kiß!". Un wenn ich jet, wat jelöscht es, söke will (man weiß jo: dat es dä Albtraum övverhaupts, wenn man ene Computer hät: ene falsche Knopp jedröck un dat Zeug es jelöscht!), dann sät hä:" Ich weiß net, wo dat es!". Un wenn hä wiggersöke soll, strahlt hä:"Ich weiß, wo dat es: dat es fott! He, he!". Esu ene Computer dät ich mir wünsche. Domet ich un all die Lück, die om Computer dran sin, och jet ze laache han!
In diesem Sinne
Ihr
Konrad Beikircher
© 2011 Konrad Beikircher für die Musenblätter - Redaktion: Frank Becker
|
Computer
von Konrad Beikircher
Das Feuilleton
15.11.11
