Vom Blatt

Mitgespielt

von Konrad Beikircher

Foto © Frank Becker
Vom Blatt

Sin Sie och jään em Theater oder en dr Oper? Ich jo. Es dat nit herrlich, wenn do bovve die Sängerinnen un Sänger en die höchsten Tön schwelje, et Orchester es am spille dat einem et Hätz opjeiht un övverhaupt kütt do dat janz jroße Jeföhl erövver. Un Du jeihst noh Hus voll Mozart un Liebe für die janze Menschheit. Esu wigg, esu jot. Also: ich wor en Salzburg (injelade, weil normal kann sich dat jo kei Minsch leiste) un han mir dä Don Giovanni vum Mozarts Wolfjang anjeluurt. Die Wiener Philharmoniker sin unge em Jrabe am jeije wat dr Darm hält, bovve sin sie am Singe, wat dr Hals herjitt un dä Barenboim es am dirijiere, bis demm die Fliech flieje jeiht. Un wie ich esu am schwelje sin, luuren ich en dr Orchesterjrave un wat es? Jot zwanzig Mann sin fott. Einfach fott. Erusjejange. Weil: em Moment han die nüß ze don. Wie? denken ich, wo jitt et dann esu jet? Do lööf Mozart un die sin fott? Un paff! zwei Minute später knallt die Dür em Jrave, paar Stöhl weede jeröck, die vier Mann om Horn un die Fläuteköpp stolpern ‘erein un satze sich. Flügg et Horn an et Muul jehale, drei Tön erusjequetsch, dann ston sie wieder op un jon erus. Dat hät mir kei Rauh jelosse. Ich erus ussem Saal un met dem Satz „I muaß zum Franz von die Hörner“ mich an dä Aufsicht vorbei en die Musikerkantin jeschliche. Un wat wor? Do sitze se: all die Musiker, wat jrad en dr Partitur nit jebraucht weede un sin Skat am kloppe. Ewwer hallo! Ussem Lautsprecher hürt mr dat, wat drin jespillt weed. Plötzlich schreit einer:“Obacht! In zwaa Minutn kummt die Canzonetta!“. Do springt einer op, schnallt sich et Mandolinche öm un av in et Orchester. Dä Rest hät in dä Zick die Kaate om Desch lieje, Jesäch noh unge, un es am waade. Un eine es am schimpfe: “Wann der Barenboim die Canzonetta wieder so langsam dirigiert wie gestern, beschwer i mi: i hab grad a Solo auf der Hand und jetzt muaß i woartn, bis die Mandolin wieder do is. Do vergeht anem jeder Gspaß am Koartenspüü!“. Noh dr Oper säht eine hinge mir: “Also die Canzonetta mit der Mandoline: war das nicht wundervoll, Schatz?“. Un jitt singem Levje ei Bützche. Un ich dacht esu bei mir: wenn die wüßten, wie eng Kaatespille un hohe Kunst zesammehänge! Andererseits: eine jote Musiker muß ocj jot vum Blatt spille künne! In diesem Sinne

In diesem Sinne
Ihr/Euer
Konrad Beikircher


© Konrad Beikircher - Redaktion: Frank Becker