I mooch net mehr

von Josef Hirschbiegler
I mooch net mehr
 
Raus soll i.
Den Schnäi wegdou.
Wo i so mied bin.
 
I mechert nix mehr missn
nix mechert i mehr
net heern, das´d an andern host
dass´s mir was wegnehmä
oder i mi wo einfindn muss
bei so aner Musterung
oder an Bataillon
Net Steier nochzahln
net heern, wos der Dokter sacht
worum i net bieseln koo
dass er wos schneidn muss
 
I mooch nimmer
 
I mechert des heern
wie domals so weich
die Stimm, des sieße Gfiehl
 
Wie a Frau hots klunga
wie a Frau hots gschmeckt
wie a Frau hots grochn
wie a Frau hob i´s gfiehlt
 
Es kommt net mehr
I mechert net mehr
 
Blouß die Stimm
wie´s sacht
Schlouf, Bou
i bin doch dou.
 
 
Josef Hirschbiegler